Жітіқараның жасыл қалқаны

Жітіқарада «Қостанай минералдары» АҚ ұйымдастырған кең ауқымды экологиялық акция дәстүрлі шараға айналды. 2021 жылдан бері жыл сайын өткізіліп келе жатқан «KMGREEN» бастамасы аясында кәсіпорын қызметкерлері серіктестермен және жергілікті қауымдастықпен бірлесіп 1000 қарағаш (үйеңкі) көшетін отырғызды. Жаңа ағаштар кәсіпорынның санитарлық-қорғау аймағы мен Жітіқара қаласының шекарасы бойында жасыл белдеу құрып, өңірдің экологиялық жағдайын жақсартуға ықпал етпек.

Бұл акция корпоративтік әлеуметтік жауапкершіліктің жарқын үлгісіне айналып, түрлі жас пен кәсіп өкілдерін біріктірді. «Қостанай минералдары» АҚ-ның басшылығы мен қарапайым қызметкерлері, Орталық Азия Хризотил Қауымдастығының (ОАХҚ) өкілдері және Жітіқараның белсенді жастары бірлесе еңбек етті. Ортақ ынта мен үйлесімді жұмыстың нәтижесінде қысқа мерзімде ауқымды іс атқарылды.

Мың ағаш отырғызу — компанияның көгалдандыруға бағытталған ұзақ мерзімді жоспарларының тек бір бөлігі ғана. «Қостанай минералдары» АҚ алдағы бес жылда жалпы саны 10 мың ағаш отырғызуды жоспарлап отырғанын мәлімдеді. Бұл бастама Қазақстан Президенті Қасым-Жомарт Тоқаевтың «Таза табиғат» атты ауқымды бағдарламасын іске асыруға кәсіпорынның тікелей қосқан үлесі болып табылады. Бағдарлама еліміздегі экологиялық жағдайды жақсартуға және жасыл аумақтардың көлемін ұлғайтуға бағытталған.

Айта кету керек, қоршаған ортаға қамқорлық жасау – «Қостанай минералдары» АҚ даму стратегиясының ажырамас бөлігі. Санитарлық-қорғау аймағы мен өндірістік алаңдарда ағаш отырғызу акциялары Жітіқара қаласы мен Жітіқара ауданы экологиясын сақтау бойынша кешенді бағдарламаның маңызды элементтері саналады. Көгалдандыру шаралары көктемгі және күзгі дәстүрлі сенбіліктер аясында да тұрақты түрде өткізіледі, оған комбинаттың барлық бөлімшелерінің қызметкерлері белсене қатысып, өндірістік аумақтарды абаттандыруға өз үлестерін қосуда.

«Қостанай минералдары» АҚ – хризотил-асбестті өндіру және байыту бойынша маманданған, Қазақстан мен әлемнің жетекші тау-кен кәсіпорындарының бірі. Қостанай облысының Жітіқара қаласында орналасқан бұл кәсіпорын қала құраушы мекеме болып табылады және өңір экономикасында маңызды рөл атқарады. Компания өндірісті жаңғырту, еңбек жағдайларын жақсарту, өндірістік қауіпсіздік пен қоршаған ортаға әсерді азайту бойынша бағдарламаларды жүйелі түрде жүзеге асырып келеді.

Қазіргі ағаш отырғызу акциясы – бұл жай ғана сандар мен жоспарлар емес, Жітіқара тұрғындары үшін жайлы әрі денсаулыққа қолайлы орта қалыптастыру жолындағы нақты қадам. Сондай-ақ бұл бастама — бизнес пен қоғамның бірлескен әрекеті туған өлкенің экологиясына оң өзгерістер әкелетінінің айқын дәлелі.